今晚深夜英冠獨腳戲白禮頓主場迎戰列斯聯，白禮頓捱過上月小低潮後，近期重返勝軌，近6場聯賽豪取4勝，當中主場更係3連勝，加上對賽往績佔優，近4次對列斯聯錄得全勝，捧主勝穩陣喎！

（TVB 302周二凌晨3時45分直播）

衰老細玩殘列斯聯
英冠排第17位嘅列斯聯，一日有班主施連奴喺度，一日都唔會有好日子過。呢位前卡利亞里班主喺2014年入主，球會從此多事，先係易帥頻頻，至今已經換過6位領隊，現任主帥史提夫伊雲斯舊年10月上任，但領軍成績唔算標青，帶隊至今踢咗21場聯賽，戰績6勝9和6負。另施連奴亦因為被控逃稅，而喺15年10月被禁出任列斯聯班主或總監一年，呢位意大利商人仲做咗好多擾亂球會軍心嘅事，包括向列斯聯球迷組織出售股份嘅交易中出爾反爾，拒售股份，又曾經阻止電視台人員入場直播對打比郡，認為咁做會影響主場入座率，真係失禮死人。

列斯聯立立亂，相反上季排20位嘅白禮頓嘅管理層做到嘢，大搞青訓，亦夠耐性等領隊曉頓執好隊波，清走冗員，再針對需要低價引入高質球員，好似老將森莫亞、從曼聯借入嘅前鋒占士威爾遜等都為球隊搶咗唔少分。白禮頓依家重拾狀態，球隊上下為取得升班資格全力以赴，近3仗主場全勝之餘，場均入2球或以上，今場主勝真係咪走雞。

河床獨立做大騷
另一場阿甲河床主場鬥獨立隊，河床近5場均開大，入得又失得，加上球隊近5次主場鬥獨立隊皆開大，大盤值捧！