近9交手全演入球騷
英聯盃決賽，「紅軍」利物浦喺溫布萊球場大戰「藍月亮」曼城。嚟到2月尾，「紅軍」終於擺脫傷兵問題同密麻麻嘅賽程，領隊高普難得遇上「幸福的煩惱」，大部分主力均可出戰今場大戰，對住攻強守弱嘅曼城，隨時合演入球騷！雙方近9次交手皆開大，1.85倍嘅入球大有買趁早。

（TVB 301周一凌晨零時30分直播）

「紅軍」係英聯盃8屆霸主，為奪冠次數最多球隊，對上一次贏得呢項賽事係11-12球季。至於暴發戶「藍月亮」曾3奪英聯盃，最近一次係13-14球季，領隊比歷連尼亦喺該季成功帶領球隊贏得英超，成為雙冠王。比帥教埋今季就會被哥迪奧拿取代，今場英聯盃決賽大有機會係佢離開曼城前最接近冠軍嘅一次！事關曼城喺英超落後榜首李斯特城6分排第4，捧英超難度高；英足盃剛剛不敵車路士出局；歐聯強隊林立，即使「藍月亮」有望進身8強，但要笑到最後捧盃而回，難度系數爆燈！

高普難得夫添 火力全開
雖然有話自從「藍月亮」宣布下季易帥後，比歷連尼就開始Hea教，但科娜唔相信佢會連盃都唔想捧囉！況且比帥深得球員尊重，阿古路、赫特、薩巴列達等主力先後公開力撐呢位62歲教頭，要求隊友出盡全力應戰，以獎盃歡送比帥。曼城上下矢志捧盃，當然係要將超強火力推到極致，王牌射手阿古路近3次鬥「紅軍」入咗2球，呢位27歲阿根廷射手喺上場歐聯作客基輔戴拿模表現搶鏡，又盛傳即將同曼城續肥約，成為隊中最高薪球星，人逢喜事精神爽，今場做埋捧盃英雄都唔奇呀！

「激情主帥」高普上任利物浦領隊短短4個月，遇上傷兵嚴重同超密賽程，搞到成績睇落同羅渣士時期差唔多，但其中一個明顯嘅改變係「紅軍」面對強隊特別醒神，打防反最煞食，代表作有聯賽作客車路士同曼城分別大勝3比1及4比1。「紅軍」近期主力相繼復出，史杜列治、菲臘比古天奴同羅拔圖法明奴組成嘅前線，射術、傳送、速度兼備，另一中場大將拉爾拉拿亦有望傷愈復出，新星奧歷治、佐敦伊比則喺後備席隨時侯命，「紅軍」面對強攻而導致防線出現漏洞嘅曼城，易食指數高喎！連同熱身賽，兩軍對上9次碰頭全部開大，當中更有7場總入球高達4球或以上，今場入球大細中位數維持喺2.5球，冇理由唔捧大盤呀！