今晚英超上演傳統大戰，由曼聯主場硬撼阿仙奴。阿仙奴啱啱喺歐聯惡戰巴塞輸波，可謂力疲心傷，近8次聯賽作客紅魔亦未贏過。曼聯雖於歐霸贏波出線，但陣中傷兵多到成個籮都裝唔晒，面對強敵唔敢冒進，加上近14次主場出擊，竟有12仗開出半場和，既然咁好路值得再追。

（now 621周日晚10時05分直播）

阿仙奴上周中歐聯16強首回合主場對巴塞，初段「做好本分」先求穩守，搞到巴塞一戙都冇，點知下半場忽然主動進攻，就畀巴塞抓緊「餐士」打突擊贏2比0，出線機會危危乎，球員體力消耗唔少嘅同時，亦嚴重打擊士氣。除此之外，阿仙奴最新財政報告顯示，截至上年11月30日球會現金儲備近1.6億鎊（約17.3億港元）！不過球會愈有錢，球迷愈扯火，事關雲格過去1年拒絕花錢買巨星，球迷信託基金發言人炮轟阿仙奴啲錢得個擺字，孤寒到爆，完全冇理過球迷感受。

朗尼馬迪爾傷兵成籮
另一邊廂，曼聯上周中於歐霸32強次回合5比1擊退米迪蘭特晉級，連贏兩場算係打番起信心，但要留意佢哋傷兵名單水蛇春咁長，除咗門將迪基亞及後衞基斯史摩寧今仗應可傷愈復出外，仍有菲爾鍾斯、艾舒利楊格、達美安、費蘭尼、朗尼、安東尼馬迪爾及「小豬」舒韋恩史迪加未好番，有指「小豬」仲要抖多1個月，可謂雪上加霜，相信拉舒福特、古利姆華利拿等新仔會續獲正選，好難期望上仗梅開二度嘅拉舒福特又嚟料，因此坐鎮奧脫福球場亦唔敢輕舉妄動。

最重要係曼聯在「戰術大師」尹戈爾帶領下貫徹控球打法，但這種穩陣行先嘅戰術，往往拖慢晒進攻節奏，以致初段經常未能攻破敵方嘅鐵桶陣，連盃賽在內，紅魔之前14仗主場賽事，竟有12仗開出半場和，絕非偶然，而阿仙奴剛激戰一場未回到氣，預計兩軍初段都會鬥拉布，半場和有1.95倍值得捧場。