日職今日開鑼，晏晝一點呢個開幕時段，有3場波同時上演，當中有直播嗰場廣島三箭對川崎前鋒，1.65倍入球大可謂投注必選；鳥棲砂岩對福岡黃蜂場「九州打吡」，就剛啱調轉傾向，撐1.63倍入球細。

佐藤壽人大久保爭射手王
講真，廣島對川崎場波（有線61、201、148周六下午1:00直播），真係講起嚟都覺得有啲悶，事關廣島打過日超盃同亞冠盃，大家對佢哋嘅最新動向一清二楚，歸納起嚟就係一句實力冇退步，都係日職爭霸分子。唯一要講講嘅係川崎，呢隊重視攻擊嘅球隊，今季嘅重點收購喺中前場，包括收番巴甲艾華爾中場伊度亞度尼圖、前鋒森本貴幸、大塚翔平、日本U23中場原川力等等，後面主要加咗件南韓國門鄭成龍，繼續保持喪攻本色。

況且，廣島佐藤壽人、川崎大久保嘉人今季都有機會挑戰中山雅史個157球日職最高入球紀錄，今場被視為射手王之爭，按理好易開入球show。何況廣島過去16次主場對川崎，有11次開大，開細嗰5次除咗一次得1球交收咁丟架，其餘4次都有兩個入球，從未試過窿對窿嘅悶戰。

相反鳥棲砂岩對福岡黃蜂場「九州打吡」，就屬於均「細」波嘞，今次係雙方歷史上第一次响日職碰頭，喺近14年裏面，兩隊响日乙交手28次，福岡戰績略佔上風，單以鳥棲主場往績為例，主隊得5勝3和6負，毫無優勢可言，大細比例都係7對7添，真係勢均力敵。

費卡甸尼井原正巳鬥穩陣
由於鳥棲今季搵咗上季FC東京主帥費卡甸尼執教，呢個意大利佬一嚟就嗌出「堅守再建」嘅口號，決心改善過去失球多嘅毛病，加埋中場主力水沼宏太、藤田直之又走埋，組織默契重建需時，今日恐怕唔敢太放手進攻。

新升班嘅福岡黃蜂都一樣，龍門中村航輔、中場酒井宣福兩件主將結束外借離隊，雖然補咗韓國新進國門李範永、中場為田大貴，同埋上季响名古屋鯨魚傷多過踢嘅哥倫比亞中場援兵丹尼臣哥度巴，但係日媒畀佢哋嘅增兵質素評級係D，綜合戰力更加係E級，難怪監督井原正巳賽前要去太宰府天滿宮祈福植樹，許願祈求唔做升降機，能夠响日職企穩陣腳。

球員時代外號「亞細亞鐵壁」嘅井原，帶波一向穩穩陣陣，上季福岡42場波只失37球，就知佢至叻玩防守，今季上到日職，又冇重磅收購提升實力，唔玩死守仲玩乜嘢？呢場「九州打吡」正路實係博入球細，進取可以諗埋1.93倍半場和。