日職今午開咧，即上演矚目大戰，由上季總冠軍廣島三箭於主場迎戰實力分子川崎前鋒。三箭季前雖放走首席射手戴恩費斯杜格拉斯，但獲得具質素嘅前鋒做替補，加上喺上周日超盃擊敗大阪飛腳，證明狀態唔錯。三箭近8次對川崎前鋒贏咗6場，近4次主場交手更全勝，今仗絕對有力響頭炮，三箭主場小讓平半捧上盤。（有線61及201台周六下午1時直播）
三箭今季最大變動係冇咗箭頭戴恩費斯杜格拉斯，呢位巴西前鋒去季聯賽轟入21球，係球隊首席射手，搞到三箭要由清水心跳借用尼日利亞前鋒彼德烏達卡做替補，暫時證明冇揀錯，佢喺上周日本超級盃3比1贏飛腳一戰有入球，配合老牌射手佐藤壽人同小將淺野拓磨，球隊鋒線火力有望得以保持。
川崎前鋒主將老化
川崎前鋒面對主力老化問題，去季日職神射手大久保嘉人已經33歲，另一中場重心中村憲剛亦都35歲，今季要保持高水平唔容易。前鋒新季主要收購有南韓國腳門將鄭成龍、巴西中場伊度亞度尼圖及曾經喺意大利聯賽搵食嘅「人氣王」森本貴幸，但一眾新兵始終磨合需時，相信難以即時發揮作用。
三箭雖然喺周中亞冠盃輸波，但季初階段球員體力始終充沛，踢多一仗反而有利提升球員狀態同默契。三箭近8次聯賽對川崎前鋒錄得6勝1和1負佳績，當中包括去季「雙殺」對手，加上對上4次主場鬥前鋒贏晒，證明剋住對手，今仗主場出擊小讓平半應可秤先。
