美洲金盃C組分組賽聽朝開打，千里達會喺美國中立場對危地馬拉，雖然睇世界排名千里達係高啲，可惜佢哋近排全部唔見晒啲射門鞋，射手堅韋尼鍾斯更加愈撈愈霉。對家危地馬拉喺熱身賽淨吞美國4蛋的確唔掂，不過亦要提防佢哋留力扮豬食老虎，既然千里達啞晒火入唔入到波都成問題，都係玩危地馬拉「讓球客勝」喇！

（開賽時間：周五早上7:00）

危地馬拉示人以弱
單講牌面，其實千里達都唔算太差，可惜最近佢哋好似食錯藥咁，就連熱身賽對名不見經傳嘅庫拉索都要輸0:1，進攻火力弱到得人驚。最慘嘅係佢哋件隊長堅韋尼鍾斯，上季霉到連卡迪夫城都踢唔掂，畀人賣豬仔借咗去般尼茅夫，信心同狀態都跌入最低谷，一個唔生性，今場好易連累千里達又食白果。

危地馬拉日前喺熱身賽係就係慘吞美國4隻光蛋，但睇落有啲示人以弱隱藏實力嘅感覺，除咗喺美職搵食嘅中場馬高柏巴、後衞伊利亞斯華斯基斯冇打正選，身為隊長嘅射手卡路士雷斯都只係後備登場，鬥完成場波油都幾乎未踩過，隨時今戰同千里達埋牙先至見真章，受讓當然係玩1.44倍「讓球客勝」抵好多啦！