危地馬拉種咖啡叻過踢波
聽朝美洲金盃輪到C組出場，千里達對戰危地馬拉，前者世界排名六十七位，危地馬拉更低排名九十三，今場係名副其實海軍鬥水兵，睇怕兩隊都唔識入波，半場都唔慌多波入，博1.88倍半場和之餘，不妨玩埋半場0比0波膽！（周五早上7時開賽，馬會網上文字直播）

千里達呢個中美洲島國人口只係得百幾萬，而盛產咖啡嘅危地馬拉則有千幾萬人口。不過足球世界唔係邊個國家人多就贏，千里達陣中擁有較多外流球員，其中前鋒兼隊長堅韋尼鍾斯應該係最有名氣嗰位，早幾年佢曾効力新特蘭，算係英超之中一位出色射手，輾轉間快將三十一歲嘅堅韋尼鍾斯依家効力另一支英超升班球隊般尼茅夫，不過喺國家隊好多時孤掌難鳴。

危軍土炮一味靠頂
至於危地馬拉今次大軍名單以効力國內最成功球會通訊體育會嘅球員為骨幹，雖然佢哋實力相對較弱，但就勝在成班球員夾慣夾熟，有晒默契。危地馬拉上周搵嚟高幾班嘅美國拍跳，結果被大炒四蛋，其實危地馬拉上下都預咗會輸得咁慘，最緊要係班球員吸取教訓，今場面對攻力唔強嘅千里達唔一定輸梗，若然危地馬拉球員做好防守工作，今仗有望保住不敗。

再睇埋兩軍對賽往績，千里達同危地馬拉近三次交手均開出細盤之餘，三場比賽嘅半場波膽都係0比0，證明兩隊都冇乜入球板斧，今場相信情況亦唔會有突變，有路可跟之下一於再博多次半場和以及半場波膽0比0！