積臣馬天尼斯虎入羊群
今日繼續上演亞冠盃，上屆冠軍FC廣州（廣州恒大淘寶）於H組登場，主場迎戰南韓球隊浦項制鐵！FC廣州繼續顯示土豪霸氣，上月以4,200萬歐元（約3.6億港元）收購馬體會射手積臣馬天尼斯，實力如虎添翼，唔只力爭衞冕，簡直想成為世界第一。加上呢支中超豪門近4屆分組賽首仗都能打響頭炮，包括兩次擊敗南韓球隊，今仗正好攞浦項制鐵祭旗。FC廣州讓半一，捧上盤。
（now 670周三晚7時30分直播）
由巴西名帥史高拉利執教嘅FC廣州，仍保留荷西保連奴、列卡度高拉特等捧盃主力，最大變動係將前鋒艾傑臣出售畀上海SP（上海上港），但並非莫財，而係有更大收購計劃，就係買入積臣馬天尼斯。呢位29歲哥倫比亞國腳效力波圖期間，曾3奪葡超神射手殊榮，卡士十足。FC廣州不惜重金從馬體會手上撬走佢，凸顯會方雄心壯志，希望有朝一日衝出亞洲，奪取世冠盃。
美中不足係FC廣州因為上屆決賽奪冠時，違規即場舉行慶祝活動，今仗被罰閉門比賽。不過會方已動員大批球迷喺場外打氣支持，加上老闆許家印為新球季準備3億人民幣總獎金，球員未開波先興奮。同埋FC廣州近4屆首仗分組賽，分別大勝全北汽車5比1、贏浦和紅鑽3比0，以4比2擊敗墨爾本勝利，仲有上屆贏FC首爾1比0。當中兩場對手都係南韓球隊，今仗鬥浦項制鐵，FC廣州球員信心已佔優勢。
被罰閉門賽球迷場外撐
浦項制鐵史上曾3次捧亞冠盃，屬各隊最多，但最近1次已經係09年。韓職球隊財力遠唔及中超，加上浦項制鐵以土炮為主，陣中塞維爾亞外援前鋒華斯連奴域名不經傳，整體人腳質素實在冇得同FC廣州比，受讓都捧唔過。
