浦項沒落主力星散
中超五冠王廣州恒大淘寶（足智彩譯FC廣州），今日响亞冠盃H組首度亮相，主場迎戰韓職老牌勁旅浦項制鐵，呢場當紅富豪對沒落企業嘅較量，唔使問梗係博廣州個2.15倍「主主」啦！

（now 670台周三晚7:30直播）

相比起其他中超豪門，廣州恒大今年喺轉會收購呢一瓣，稱唔上豪氣，最大筆嘅收購只係用4,200萬歐元（約3.6億港元）羅致馬體會前鋒積臣馬天尼斯，但又同時放走咗艾傑臣等幾件功臣，連羅賓奴都留唔住，畀人一種好低調嘅感覺。但係咁並唔代表恒大縮咗皮，事關佢哋個班底本身就好強，除咗一批當打中國國腳，又有列卡度高拉特、荷西保連奴同埋金英權呢啲高質外援，今年加入嘅新面孔李源一、徐新甚至楊超聲，都係年輕又具潛質嘅新星，提升咗成隊波嘅活力同發展潛力，所以依然被視為中超以至亞冠嘅奪標大熱。

「抓鐵有恒」海報顯信心
正因為實力不遜上季，恒大夠膽响今季亞冠第一張宣傳海報，借用習近平嘅一句「抓鐵有痕」（意即形容做事不達目標不罷休，唔理做乜都要留下功績），改成「抓鐵有恒」，寓意恒大會砌低浦項制鐵，信心、決心不減從前。

恒大夠膽口出豪言，並非單純相信本身實力，最重要是浦項制鐵因為背後財困業績退步，投入資金減少，季前有主將「離家出走」，譬如趙傑鎬、申真浩去咗FC首爾，金泰洙就跳槽仁川聯，國腳中場金承大直頭加盟咗中超球隊延邊，巴西兵堤亞高亦都走人，搞到剩番個塞爾維亞前鋒華斯連奴域，幾乎係支全韓班咁滯，今日對住恒大真係唔輸至唔正常。

不過，南韓球隊向來以鬥志見稱，浦項嘅奧運腳文昶辰、姜祥佑、翼鋒沈東雲、長人中鋒梁東炫都有唔錯嘅戰鬥力，加埋恒大因為上屆決賽未經亞洲足協批准搞咗啲「有安全問題嘅表演」，今日被罰閉門作賽，啲球迷只能夠响天河體育場南廣場睇大電視打氣，點都削弱咗啲主場氣勢，所以未必炒得爆浦項，但係上下半場各省一粒開個「主主」，應該仲係夠晒本錢嘅。