防反戰術硬頂地上最強
今夜歐聯16強首回合爆發超強激戰，由阿仙奴主場硬撼上屆盟主巴塞隆拿。兩支技術流球隊對碰肯定精彩到暈，牌面上整體實力幾乎無敵嘅巴塞當然可被睇高，但阿仙奴主場出擊定會負隅頑抗博偷雞。事實上兵工廠遇強時採用嘅快速防反戰術非常銳利，而巴塞「MSN」組合雖然恐怖，但防線卻不甚穩陣，近期喺西甲對下游弱旅都有失波，加上之前5度喺歐聯交手全部開大，大盤值得再追。

（有線61、64、201及203台周三凌晨3時45分直播）

巴塞MSN數據超恐怖
查實阿仙奴近年於主場出戰西甲兵有一手，過去10年喺歐聯曾6次主場迎戰西甲球隊，錄得4勝2和佳績，其中兩次喺淘汰賽首回合主場鬥巴塞取得1勝1和，因此絕對有得砌。阿仙奴以往強調控球打法，但前幾年交得太多學費，主帥雲格由上季開始每逢出戰擅於控球嘅強隊，都會主動縮後先做好防守先，並利用阿歷斯山齊士（A山）及阿歷士張伯倫等打快速反擊，就係憑住呢招，近兩季都曾擊敗過曼城、今屆歐聯分組賽主場又贏到拜仁，證明雲格學精咗，唔會同你鬥攻咁天真。

巴塞有幾勁唔使多講，淨係「MSN」組合美斯、蘇亞雷斯及尼馬已經玩晒，呢3位神級前鋒今季於各項賽事有份參與嘅入波同助攻，佔全隊119球中嘅102球，單計「MSN」自己入波就有91球，呢啲冷冰冰嘅數據，證明佢哋面對任何防線幾咁「冷酷無情」。只係巴塞後防唔係咁穩，近幾周西甲即使對住利雲特、希杭同拉斯彭馬斯呢啲弱旅都未能淨勝，作客對住反擊力強嘅「槍手」，隨時有失波危機。

近5次交鋒全演入球騷
更何況巴塞近年食住英超兵，之前7次對英超球隊獲5勝1和1負，包括近4次對曼城全勝，又點會驚阿仙奴呀？就算作客都會主動進攻，但要留意阿仙奴有弗到漏油嘅中場奧斯爾，如果「地上最強」谷得太前，反而令呢位「助攻王」有更多空間放靚直線，畀倒戈嘅A山等快翼狂打反擊「偷雞」。況且兩軍之前5次喺歐聯正面交鋒，全部開入球大，今仗大騷可期。