山東強化防守
亞冠盃分組賽今揭開戰幔，日超盃出爐冠軍廣島三箭响F組開鑼戰，主場迎擊中超強隊FC山東（山東魯能），向來防線以亂出名嘅山東，今季刻意強化防守，前45分鐘有權摸和主隊，2.15倍半場和博得過。

（廣東體育周二晚6:00直播）

山東官網賽前出咗張名為「斷箭明志」嘅海報，顯然就係決心作客搞掂廣島，其實佢哋能唔能夠達成心願，好睇廣島呢班人發唔發揮到「三本之矢」嘅精神。所謂「三本之矢」，係日本戰國時代嘅一個故事，講藩主毛利元就用三支箭教三個囝囝，一支箭易折，三支箭合埋就冇人整得斷嘅道理，廣島命名三箭就係要效法嗰種團結精神。查實中國人點會唔知呢個道理吖，《魏書?吐谷渾傳》裏面就有呢種「單者易折，眾則難摧」嘅道理，早過日本成千年咁滯。

三箭夠團結機動性強
但係山東想斷「箭」的確唔係咁易，原因係廣島呢班波真係比較團結，打法整體得嚟好有機動性，雖則戴恩費斯杜格拉斯離隊削弱佢哋鋒線嘅衝擊力，但係由上星期佢哋响日超盃贏大阪飛腳3:1去睇，補入嘅彼得烏達卡固然啱用，更重要係淺野拓磨、茶島雄介、野津田岳人幾個愈嚟愈成熟，人腳冇乜大變嘅廣島，反而係一支攻守兼備，默契一流嘅球隊，確實做到三箭合一嘅初衷。

相反山東有中超球隊嘅一個通病，就係組織相對散漫，攻防流暢程度比較差，舊年佢哋更加因為防線太曳，經常贏埋唔夠輸。好彩由新帥文奴文尼斯執教嘅山東，喺引入巴西長人中堅基爾拿斯文圖之後，踢法趨向穩健，唔再有前冇後，今晚客場出擊，更加唔會貿然搶攻。況且中場大腦王永珀坐波監、鋒將「野牛」艾萊斯奧又冇報名，少咗兩件進攻好手，肯定處處謹慎行事，上半場以守為攻好正路，半場和自然抵博。