繼上周踢完墨爾本市打吡，今日澳職就輪到悉尼打吡激戰，ＦＣ悉尼主場硬撼西悉尼流浪者，兩軍近期均陷小低潮，但ＦＣ悉尼勝在對賽往績佳，加上有主場之利，平手盤梗係撐ＦＣ悉尼喇！

（有線64、203台周六下午4時30分直播）

今場係本季第3次悉尼打吡，ＦＣ悉尼對上兩次均憑比賽末段入波、分別險勝流浪者1比0同2比1，延續近6次打吡不敗走勢。ＦＣ悉尼自上月初勝出打吡戰後，近4仗聯賽錄得1和3負，不過西悉尼流浪者近況同樣唔掂，上仗主場出擊竟然以2比5慘敗於下游球隊威靈頓鳳凰腳下，連續兩場聯賽失分，對角逐常規賽冠軍造成士氣打擊。

近3對賽悉尼贏晒
ＦＣ悉尼聯賽19仗失21球，係澳職失球最少隊伍，比起近6仗狂失15球嘅流浪者防線較值得信賴，加上客隊今場有後衞艾斯普保達美迪斯坐波監，防線大穿窿。流浪者本身攻力唔錯，今季只有兩場聯賽入唔到波，其中一仗正正就係首循環作客ＦＣ悉尼輸0比1；計埋呢場，ＦＣ悉尼近3次主場鬥流浪者皆贏波，頗有格食格味道，平手盤捧主隊最啱數！