今晚西甲巴塞隆拿又出擊，作客拉斯彭馬斯。論牌面巴塞贏晒，但要留意「地上最強」剛於周中踢完西甲補賽，而且下周中仲要出戰歐聯16強首回合作客阿仙奴，賽程好頻密。既然今仗遇上弱隊，教練安歷基正好趁機收起「MSN」鋒線等主力抖一抖。拉斯彭馬斯技不如人，只能靠「泊大巴」死守博攞1分。入球大細中位數3.5球，建議揀入球細。

（now 632周六晚11時直播）

巴塞周中又贏1場，以3比1擊敗希杭，美斯如願成為西甲史上首位入波達300球嘅球員，今仗可以放心休息。隨住歐聯重開，安歷基肯定更注意兵源調配，力爭再次成為「三冠王」。特別係下周中歐聯16強首回合作客硬撼阿仙奴，絕對不容有失，需嚴陣以待。今仗西甲對排尾三嘅拉斯彭馬斯，殺雞焉用牛刀，輪換陣容亦好合理。

事實上，巴塞已領先次席馬體會6分，可全力攻打歐聯，冇必要大炒拉斯彭馬斯。值得一提，巴塞早前喺西班牙盃4強次回合，派副選對頹爆嘅華倫西亞，最終打和1比1，可見「地上最強」對弱勢社群，都有憐憫之心。

砌勁旅小敗居多
拉斯彭馬斯受降班威脅，但卻無力贏巴塞，惟有守死，希望搶得1分得1分。呢支今季新升班球隊開季首仗對馬體會，僅負0比1，首循環作客巴塞，都只係輸1比2，可見佢哋對勁旅，表現唔太失禮，估計今仗小負居多。