德甲拜仁慕尼黑主場鬥達斯泰特，原本已經強弱懸殊，依家達斯泰特教練舒侯斯達仲玩小把戲，利用呢場預咗輸嘅波畀陣中5大中後場主力停賽「洗底」，作客安聯聽抬蛋，「讓球主客和」拜仁讓兩球濕濕碎，1.65倍讓主咪走雞！

（now 670、有線64及203台周六晚10時30分直播）

達斯泰特今季表現同成績遠比預期理想，有計教頭舒侯斯達居功厥偉。不過佢哋始終人腳有限，今季唯一目標就係護級，去到上輪聯賽對利華古遜，舒侯斯達又出新招，喺完場前8分鐘睇到落後追唔番之下，達斯泰特一眾主力竟然策略性輪流攞黃牌，結果中後場5大主力齊齊喺今仗對拜仁停賽，但又可以趕及下輪護級戰對雲達不來梅復出，用心良苦。賽後傳媒問舒侯斯達係咪故意，佢連否認都冇，只係顧左右而言他。

本輸嚟踢順便洗底
達斯泰特5位停賽球員包括隊長艾達蘇路，佢係球隊最佳後衞，亦係3號射手；副隊長馬素希拿，球隊最佳中場同2號射手，上述兩人踢足今季每場聯賽。另外3個包括左翼衞拉殊同一對正選防守中場謝路美干多夫同尼美亞，呢3位球員今季都只曾缺席聯賽1次。中後場突然冇咗咁多主力，就算大球會都唔掂，何況達斯泰特今季只有13位球員踢過超過一半賽事，人丁單薄！

拜仁3日後會喺歐聯作客祖雲達斯，今仗預咗會輪換，不過佢哋向來歐聯前嘅聯賽都有好成績，何況即使近期防線傷兵多，近6仗主場比賽依然全勝兼零失球，前線擁有羅拔利雲度夫斯基、湯馬士梅拿、洛賓同列貝利等世界級球星，加上杜格拉斯哥斯達同京士利高文等當弗球員，人才過剩，就算一人踢半場都夠殺有餘啦！