英超最後4輪衝刺，繼續聚焦於前四之爭。復賽後狀態大勇的車路士，今晚造訪黑馬錫菲聯，雖然讓至一球，白頭沈仍看好上盤可以坐和望贏。

戰火重燃以來，表現較對辦的球隊不外乎利物浦、曼城、車路士及曼聯這些傳統豪門。不過比起前兩者，車仔及曼聯則仍要為來季歐冠席位而拚搏，除了狀態之外，戰意更是毋需懷疑，以季尾波而言是更可取的對象。

今季仲未踢完，車仔已率先揮金購入薛耶治及迪姆華拿兩位世界級球星，專門報導體育的傳媒，解讀為班主阿布拉莫域想趁肺炎疫情，為愛隊撈底執平貨。不過歐美的財金專家，則另有一番見解，認為阿布是想透過在球壇高調入貨，向政經界證明自己依然水源充足。畢竟，所謂的豪購球員，都只是一個億（歐元）而已，對阿布這種級數的財閥而言，只是九牛一毛，再者換來宣傳效果，何樂而不為。

一場疫情，除了星斗市民受苦，生意佬更是首當其衝受到影響，除非你係專門生產口罩嘅啫。做生意最棹忌係乜？梗係畀人唱啦！據傳近期商界流傳，不少富豪頻頻打電話搵經紀查詢超級遊艇、豪宅及酒莊售價，但唔係真係買喎，可能都係想借經紀佬把口，放風話佢掂啫。

無論阿布係咪搞小動作都好，近年車仔增兵的方向正確，今季加盟的美國隊長基斯甸普列錫復賽後鋒芒畢露，加上美臣蒙特、韋利安皆大勇，可領戰車再下一城。