歐聯跟尾要速戰速決
為咗遷就祖雲達斯下周中踢歐聯，「斑馬軍團」今晚提早出戰意甲作客博洛尼亞。佢哋自從喺上年11月回勇後，取得聯賽15連勝，淨係個勢都足夠震懾對手，唔少球隊甚至半場未過就提早投降，相信祖雲達斯今次都會嗱嗱聲解決博洛尼亞，留力下周中歐聯16強大戰拜仁慕尼黑，一於博2.25倍客客。

（TVB301周六凌晨3:45直播）

祖雲達斯近年喺意甲打遍無敵手，雖然佢哋季初有所失準，但自從由上年11月回勇後，一口氣喺聯賽連贏15鋪。上仗更喺主場1:0砌低爭標大敵拿玻里，今季首度登上意甲榜首位置添！家陣班波殺得性起，博洛尼亞仲點會係佢哋手腳吖！

下周中主場惡鬥拜仁
再講吖，「斑馬軍團」喺最近6次意甲作客，有5場喺換邊前就攻破對手大門取得領先優勢。為免夜長夢多浪費體能，佢哋呢鋪肯定一開波就喪攻，務求盡快領先，方便換走班主力出場提早休息，留力惡鬥拜仁。

博洛尼亞近5次交手輸晒
另邊廂嘅博洛尼亞近5仗主場僅得1勝2和2負，即使箭頭迪斯度重拾射門鞋，都好難捧得落手。仲有呀，佢哋有主力守將羅錫天尼受傷倦勤，防守力大減。更大鑊嘅係呢班波連續5次鬥祖記全部輸晒，怕且呢鋪連半場都守唔到，仲點寄望佢哋喺下半場追和或反勝先？博「客客」啦！