迪阿歷辛度回歸有料到
阿甲球會近年頻頻招攬過氣球星回歸，雖然佢哋已踏入職業生涯黃昏時期，但所謂爛船尚有三斤釘，仍可發揮重要作用。河床今季簽入前禾夫斯堡中場迪阿歷辛度，呢位34歲阿根廷老將上仗首次披甲，即貢獻1次助攻，功架十足，今仗主場對葛度爾古斯，主W熱爆，可博讓球主勝。
（周五早上8時15分開賽）
出身於河床青年軍嘅迪阿歷辛度效力過禾堡、樸茨茅夫、薩拉戈薩等球會，曾為國體會捧南美自由盃及南球盃，大賽經驗豐富，有呢個老大哥擔任中場指揮官，可以大大提升河床進攻組織力。河床開季後兩戰攻入7球，加上近4次對葛度爾古斯獲得全勝兼不失球，今仗淨贏兩球或以上，機會樂觀。
拉魯斯「客」窒坦柏利
另一場阿甲，坦柏利主場對拉魯斯，主隊攻力極弱，開季兩場都冇波入，跨季4仗食白果。反觀拉魯斯延續上季氣勢，開鑼後兩戰兩勝，跨季已6連勝，新加盟嘅35歲前鋒荷西辛特寶刀未老，上仗梅開二度，證明球隊增兵策略見效，今仗可望再下一城。
至於高隆主場對貝格拉諾，高隆狀態弗爆，兩戰全勝共攻入6球，中場新星阿倫雷斯已有兩球進帳。貝格拉諾上仗以3比2擊敗勁旅河床，鬥志非常頑強，雙方今仗應會有一番惡鬥，最好捧大盤。
