將帥重遊德國歎慢板
歐霸盃32強首回合賽事，奧格斯堡主場迎戰利物浦。紅軍喺今屆歐霸盃演出唔算進取，6仗賽事5次開半場和，3次客途出戰半場更加係全開0:0。至於對手奧格斯堡牌面比紅軍弱，就算有主場之利亦未必敢輕言冒進，而且佢哋今季主場面對強敵，多次喺換邊前都未能夠分出勝負，今仗一於繼續追2.05倍半場和。
（now670台周五凌晨4:05直播）
利物浦去年10月換上新帥高普執教，球隊仍在適應當中，加上傷兵及賽期頻密問題不斷困擾佢哋，令紅軍表現非常反覆。雖然佢哋上仗作客6:0大數維拉，但再早一仗就可以喺英足盃畀韋斯咸淘汰，計落球隊已經連續12場作客未曾連勝過，所以即使佢哋上仗大勝維拉，呢鋪都唔好咁快盲目追捧。
兩軍近期都以穩為先
何況嚟到歐霸盃賽事，紅軍唔算特別肉緊，佢哋喺6場分組賽中，有5次開半場和。其中3仗作客賽事就更見保守，直頭冇任何交收，何況今場係高普首次帶領紅軍嘅前德甲兵羅拔圖法明奴同安利簡恩重遊德國，遇上熟晒佢哋波路嘅奧格斯堡教練韋恩薛亞，上半場會謹慎行先。
奧格斯堡無論名氣同狀態都差啲，被睇低一線嘅情況下，怕且都唔敢胡亂搶攻，好大機會繼續求穩。佢哋近期主場鬥法蘭克福，以至較早前對多蒙特、禾夫斯堡等實力分子，以及最後2場歐霸盃對柏迪遜同畢爾包，都係開出半場和。既然雙方風格同樣都係唔急住鬥攻，半場和值得再追。
