「蝙蝠俠與羅賓」弗到震
歐霸盃嚟到32強勁旅林立，今晚首回合賽事就有唔少矚目戲碼，包括兩支歐聯常客多蒙特同波圖正面交鋒。德甲勁旅多蒙特上季失準搞到要踢歐霸盃，不過今季已經回復霸氣，絕對有能力染指呢個賽事冠軍，「蜜蜂兵團」主場威力驚人，加埋「蝙蝠俠與羅賓」奧巴美揚同馬高列奧斯弗到震，今晚迎戰波圖一於捧2.05倍「讓主」！

（now670周五凌晨2:00直播）

多蒙特目前喺德甲力追班霸拜仁慕尼黑，歇冬後喺聯賽同德盃拎得4勝1和嘅不敗成績，當中「蝙蝠俠與羅賓」奧巴美揚同馬高列奧斯夾手夾腳省入5粒不特止，另一名進攻好手米希達利恩亦都斬獲3球，以「蜜蜂兵團」依家嘅雄厚兵力，喺歐霸盃絕對係頂尖之列，捧盃應該係佢哋今季一個重要目標。

多蒙特例啅葡國兵
唔好忘記多蒙特主場威力相當驚人，近9仗正式賽事主場出擊拎到8勝1負，輸嗰場亦只不過係因為喺歐霸盃分組賽提前出線，大踢風流波先輸，而且當中有6仗係淨贏對手2球或以上，表現極有說服力。值得留意嘅係，「蜜蜂兵團」近3次主場對葡萄牙球隊錄得全勝兼怒轟10球，今仗絕對係佔盡上風。

波圖分心葡超難靠
至於葡超球隊波圖過往14次作客德國球隊，僅得3勝4和7負，今仗形勢唔多樂觀，而且佢哋喺葡超落後榜首士砵亭6分暫列第3位，爭標形勢岌岌可危，分心在所難免。波圖近6仗作客3勝3負，其中2場勝仗對手只係弱隊艾斯杜尼同基維辛迪，贏得唔多夠說服力，今場造訪多蒙特真係想唔輸都幾難。