兩個光頭佬 落柯打喪攻
賓施馬搏命 報效施丹
皇馬1月頭怒炒賓尼迪斯，搵施丹出任新帥，畢竟呢位法國球王於球員時代擸盡錦標，單靠個人威望已能震懾一眾大牌球星，C朗、占士洛迪古斯、賓施馬等個個都搏甩髀，其中佢契仔賓施馬更非常Sharp醒，施丹上任後6仗入咗7球，同大佬C朗一樣，但要留意「賓仔」只有上仗對畢爾包食白果，比起有3仗冇進帳嘅C朗更弗。
由於「賓仔」捲入性愛勒索案而遭法國國家隊除名，一日單官司未完結，佢都唔使旨意返國家隊踢今夏歐國盃，施丹一向好錫呢位師弟，因此不斷畀機會佢，賓施馬亦不斷入波嚟報答施丹嘅信任。睇番皇馬即使喺以保守見稱嘅「肥賓」帶隊嗰陣都喺分組賽狂入19球，如今喺施丹領導下相信只會變本加厲，皇馬近6仗狂轟23粒，火力驚人，今場作客一於照攻可也。
史巴列堤 激活眾鋒將
羅馬方面亦喺1月搵來另一「光頭佬」史巴列堤回巢執教，史巴列堤熟悉球會運作，深明呢隻「雌狼」係流住激情嘅血液，因此佢上任後嘅首要任務係全面激活一班前鋒，冬窗借番嚟嘅艾沙拉維頭兩次披甲入兩粒，上仗擊敗卡比箭頭迪斯高打破長達3個月嘅入球荒，翼鋒穆罕默德沙拿亦重拾佳態，令羅馬近4仗全勝更開出3口大。
不過，史帥帶咗6仗僅一仗冇失波，面對維羅納、費辛隆尼、森多利亞同卡比等弱旅都未能零封對手，後防不穩問題未解決，今仗對住皇馬肯定又會以攻代守，大細中位數為2.5/3球，入球大不容錯過。
