施丹接手火力全開
今晚續演歐聯16強首回合賽事，羅馬主場迎戰皇家馬德里。兩軍今年初齊齊換帥，講成效以「銀河艦隊」最明顯，施丹上任後球隊唔止回勇，而且攻擊力大有改善。「雌狼」成績雖然都有好轉，不過冇皇馬咁Sharp醒，而且佢哋防守冇太大改善，相信難擋皇馬進襲，就算受讓半一都制唔過，捧皇馬2.05倍上盤。

（有線61、64、201、203及中央5台周四凌晨3:45直播）

皇馬更衣室向來多是非，想搵個大家心服口服嘅教練並唔容易，前任主帥賓尼迪斯更加出名唔多識同球星保持良好關係，加上戰術備受質疑，最終呢位西班牙教練喺上個月落鑊，改由名宿施丹領軍，「銀河艦隊」隨即重拾霸氣。

皇馬6戰轟23粒
首先係皇馬內部變得更團結，除咗C朗大讚施丹嘅足球理念，占士洛迪古斯日前亦認同換帥有益無害：「換咗教練後全隊都得益，唔止係我，其他隊友狀態都比之前好好多。」講真，皇馬陣中粒粒皆星，只要佢哋全心全意落場搏殺，等閒球隊邊係佢哋對手吖？

睇番「銀河艦隊」喺施丹上任後，拎到5勝1和佳績不特止，更令捧場客放心係佢哋重拾過去強大火力，6戰勁轟23球。C朗更憑住上仗鬥畢爾包梅開二度，登上西甲射手榜首位，就連以組織調度能力見稱嘅中場卻奧斯，亦順利攞到佢本人今季首個入球。家陣班波腳風咁順，堅唔好同佢哋作對。

羅馬連續4戰主場失波
雖則話羅馬同樣有新帥領軍，班波喺1月中委任史巴列堤執教鞭，經過適應期後表現係有好轉，最近仲連贏4場添。之不過佢哋贏嘅對手包括費辛隆尼、森多利亞同卡比呢堆護級球隊，爭咁啲說服力喎。再講「雌狼」喺今屆歐聯表現麻麻，6場分組賽贏得1鋪，對住同組最弱嘅巴迪都贏唔到，的確牙煙。何況羅馬防守仲未有改善，最近4次主場出擊都有失守，呢勻好難頂住皇馬啫。