萬眾矚目嘅歐聯終於返嚟喇！今晚16強首回合即爆發重頭大戰，法國豪門巴黎聖日耳門（PSG）主場硬撼英超褪色勁旅車路士，雙方可謂冤家路窄，之前兩屆均喺淘汰賽碰頭，各自晉級一次，論實力絕對係半斤八両。PSG喺主帥白蘭斯調教下，成為今屆分組賽失球最少球隊，當中3仗主場全開細盤，車仔喺名帥希丁克帶軍下，客場出擊但求不失，絕唔會輕舉妄動，今仗唔慌多波入，細盤不容錯過。
(有線61及201台周三凌晨3時45分直播)
首回合穩字行先
法甲土豪PSG已非昔日吳下阿蒙，連續3屆躋身歐聯8強可見一斑，佢哋啱啱同教練白蘭斯續約2年，穩定軍心。白帥球員時代係法國勇奪世界盃及歐國盃嘅冠軍後衞，特別注重防守，今屆喺佢調教之下，PSG於6場分組賽只失1球，冠絕群雄，當中3仗主場更保持清白之身，並全部開出細盤，以堤亞高施華及大衞雷斯為首的防線，可謂固若金湯。
另一邊廂，車仔「老狐狸」主帥希丁克亦好施「守」術，自上年12月中接手後，5仗客場不敗之餘，更有3仗開出細盤，包括悶和曼聯及擊敗阿仙奴均冇失波。希帥深明歐聯賽場以穩陣行先之道，最經典係09年帶領車仔4強兩鬥火力強大嘅巴塞均打和（首回合作客0比0、次回合主場1比1），僅輸作客入球飲恨出局，其布防之精密令人讚嘆。
希丁克加固防線
相比之下，車仔有守將葛特蘇馬重創長抖，另一中堅泰利亦受傷上陣成疑，希丁克勢必加固防線，而PSG中場樞紐馬高華拉堤同柏斯托尼啱啱好番未操起，講明會先任後備，供應不足下，隨時令前面嘅伊巴謙莫域、卡雲尼及迪馬利亞啞火。
上屆雙方同樣於16強相遇，首回合打成1比1，預計兩隊唔想首回合稍有差池而陷於被動，必定穩打穩紮，入球細乃不二之選。
