歐霸盃32強首回合今晚搶閘上演，打頭陣「獨腳戲」有費倫巴治主場對莫斯科火車頭。土耳其豪門費倫巴治有尹佩斯、拿尼、迪亞高、積亞等名牌掛帥，星味十足，大賽經驗亦有保證，相反俄超仲係歇冬，火車頭球員狀態成疑，一於捧1.53倍費倫巴治主勝。
（now670周三凌晨1:00直播）
俄超未歇完冬
費倫巴治近年「收集」唔少巨星，尹佩斯、拿尼、卡積亞同迪亞高4大天王都喺歐洲頂尖聯賽搵過食，實力同經驗夠晒保證，出戰歐洲賽大派用場。費倫巴治不惜工本買球星，就係想喺歐洲揚威，呢項「二奶盃」絕對係佢哋目標。值得留意係，上年11月發生土耳其擊落俄羅斯戰機事件，兩國關係緊張，土耳其球迷出名火爆，費倫巴治今場肯定當成生死戰咁踢，誓要贏波為國爭光。
俄超自上年12月中開始歇冬，要等到3月初先至重開，換言之，莫斯科火車頭已經2個月冇踢過正式賽事，球員狀態肯定大打折扣，今場一嚟就要作客土耳其地獄球場，頂唔住都好正常。
