人日兼情人節，真?Big4對決！今日係人人生日嘅「人日」，適逢亦係西方情人節，喺呢個既喜慶又浪漫嘅日子，英超亦上演前4名球隊互片戲碼，頭場先有「1哥」李斯特城造訪「阿3」阿仙奴，仲有「阿4」曼城主場火併「2哥」熱刺守尾門，真?Big4對決刺激到暈，陪各位歡度佳節。

廠仔勁跌Watt強捧李城讓客
「神奇1哥」李斯特城作客硬撼阿仙奴，「狐狸」近期連挫利物浦同曼城，甩開次席熱刺5分，氣勢一時無兩，相反阿仙奴踏入2016年明顯下滑，從「半程冠軍」跌落依家嘅第3位，呢班波慣性2、3月跌Watt，李斯特城主帥雲尼亞里誓演12年前搞寸兵工廠歐聯爭標Party嘅好戲，「狐狸」仲有得受讓，強捧讓球客勝。

（now 621周日晚8時直播）

狐狸着火冠軍不是夢
李斯特城今季異軍突起，好多人眼紅話佢哋經驗不足，必定會喺關鍵時刻「冧檔」，點知隻「狐狸」愈踢愈有，特別係年頭英足盃出局，專心打聯賽下近期連贏3場，包括勇挫利物浦及曼城，尤其上仗打到曼城一戙都冇，無論前線嘅「華Dee」占美華迪及馬列斯，抑或梅開二度嘅過氣德國國腳中堅賀夫都弗到漏油，令人開始憧憬佢哋「奪標不是夢」。

相反，阿仙奴踏入2016年之後，表現隨即滑落，6場英超夾埋失咗一半分數，從「半程冠軍」跌落第3位，與榜首李城相差5分。而且阿仙奴習慣每逢去到2、3月，因戰線太多而力不從心，佢哋踢完今仗後，要應付英足盃對侯城同歐聯強敵巴塞，聯賽又要作客曼聯兼同熱刺合演北倫敦打吡，場場都係硬嘢，同只剩下聯賽戰線嘅李城相比，阿仙奴後顧太多。

前年先畀希臘國家隊炒魷嘅雲尼亞里，估唔到今季重返英超執教李斯特城後踏上神奇之路，雲帥最成功一着係懂得讓眾將冇壓力下比賽，由季初訂立40分成功護級，到話最重要係下一場波，畀到球員足夠嘅動力。雲帥從未帶隊攞過頂級聯賽冠軍，但佢執教生涯最吐氣揚眉一刻，正係2004年歐聯8強次回合，率領車路士作客落後1球下，一改保守風格「撳掣」搶攻，最終以2比1反勝阿仙奴晉級，粉碎呢支雲格麾下嘅聯賽不敗雄師勇闖歐聯夢。雲尼亞里梗係想重演好戲，以「華Dee」為首嘅鋒線火力驚人，令李城以47個聯賽入球，拍住億萬大軍曼城並列「冧巴溫」，絕對唔赦阿仙奴，今場仲有得受讓咁筍，讓球客勝咪錯過。

曼城熱刺大開有條路
「阿2」熱刺作客「阿4」曼城，熱刺近排弗到漏，連盃賽近6場全勝，哈利卡尼、迪利阿里、基斯甸艾歷臣等進攻主力愈踢愈有，作客曼城球場未驚過！「藍月亮」上場喺榜首大戰對李斯特城「完敗」，今場誓要贏波保住奪冠希望之餘，仲要報番首循環畀熱刺大炒1比4之仇。兩隊以往碰頭例牌開大，今場大盤有1.7倍真係有買趁早呀！

（now 621周一凌晨零時15分直播）

熱刺今季唔聲唔聲，贏完一場又一場，依家竟然可以力壓阿仙奴同曼城兩大爭標熱門，排喺第2位，王牌射手哈利卡尼已經轟入15個聯賽入球，而今季強勢彈起嘅19歲超新星迪利阿里亦累積7入球5助攻，熱刺上場鬥屈福特，正正就係迪利阿里後備落場冇耐即交出助攻，協助球隊小勝1比0。

近9對戰8開大盤
其實熱刺今場對曼城賽前形勢同11-12球季有啲相似，當年熱刺只要作客擊敗榜首嘅曼城，就可以縮窄分差至2分，但熱刺最終輸得好唔抵，「藍月亮」嘅巴洛迪利踩人頭但逃過紅牌，最尾更喺90分鐘射入絕殺12碼，以3比2擊敗熱刺，而曼城當季就成功捧走英超冠軍。歷史會唔會重演當然冇人知，但科娜就知雙方交手旺開大，近9次對戰有8次開入球大，包括熱刺今季喺首循環大炒曼城4比1、曼城對上兩次主場分別狂數熱刺4比1同6比0，今場入球中位數維持喺2.5球，大盤抵玩喎！

曼城有中堅高柏尼傷愈復出，但呢位29歲隊長今季長期受傷患困擾，過去3個月僅落場9分鐘，一復出即踢呢場關鍵大戰，可能唔係幾穩陣喎！不過「藍月亮」都會以進攻為主，力求全取3分縮窄同榜首李斯特城嘅距離，雖然奇雲迪布尼、捷西斯拿華斯等進攻球員因傷缺陣，但中場核心大衞施華應可擺脫足踝傷患上陣，同史達寧齊齊支援大勇嘅阿古路入波，今場一於捧大喇！