熱拿亞作客蟲咪上當
意甲波一向蠱惑多，不過肥叔就鍾意喺意甲搵筍盤，今晚重心推介場次係早場AC米蘭主場對熱拿亞，眾所周知熱拿亞係作客蟲，一離開主場就唔識踢波，初盤受讓半一兼有2倍高水，邊有咁大隻蛤乸隨街跳呀？一於撐AC上盤。

（TVB 301周日晚7時30分直播）

睇開呢個欄嘅都知道，熱拿亞多年來喺評級指數均被定為主強客弱，因為主場可以踢到曉飛，作客就有心冇力，今季仲衰，主場12戰僅得5勝，作客則「保持水準」，12仗錄得1勝4和7負嘅劣績，係一條徹頭徹尾嘅作客蟲，難怪依家排下游要為護級搶分喇。肥叔對熱拿亞一向抱住「主場捧，作客反」嘅原則，但今季連主場都唔敢捧，作客更加避得就避。況且對手AC米蘭明顯有起色，連盃賽近7仗取得5勝2和，同近4仗不勝僅入1球嘅熱拿亞相比，何只贏一條街？初盤AC要讓半一，甚至被質到得1.84倍嘅低水，相反熱拿亞有2倍咁好分，擺明備受莊家睇淡，梗係繼續反佢哋喇！

另一場心水意甲，係森多利亞主場對阿特蘭大，兩隊同樣近況曳爆，森多近6仗不勝之餘，更輸咗5場，絕對有條件開平手盤，但莊家仍堅持要森多讓平半，而且水位比阿特蘭大仲低啲，似乎有啲景轟喎，加上出面係咁吹阿特蘭大淡風，肥叔認為森多上盤值得持有。

利物浦搵維拉出火
最後英超阿士東維拉主場對利物浦，紅軍剛喺英足盃出局，谷埋成肚火，誓要搵包尾嘅維拉發洩，近5次造訪維拉贏4次，就算讓半一都要捧場。

（now 621周日晚10時05分直播）