「美國隊長」丹爺搣柴成肚火
好波停不了，美洲國家盃落幕冇耐，輪到美洲金盃接力！由美國同加拿大合辦嘅第13屆美洲金盃，明早正式開打，東道主美國衞冕第一擊，喺A組首輪迎戰洪都拉斯。「美國隊長」丹普西早排美職聯賽盃發癲襲球證，唔單止要坐波監，仲畀美國主帥奇連士文「搣柴」冇得做隊長，滿腔怒火，誓搵洪都拉斯開刀，直取「花旗國」讓球主勝。（周三早上9時30分開賽、馬會網上文字直播）

作為上屆盟主，美國對金盃志在必得，主帥「奇哥」奇連士文徵召咗丹普西、艾迪杜里、米高巴特利、法比安莊臣、贊特拿、耶迪連、布魯克斯等主力，可謂誠意十足，「奇哥」賽前講到明，雖然隊隊都想爭冠，而且墨西哥同哥斯達黎加實力唔錯，但美國最終一定力壓群雄捧盃，信心爆棚。其中丹普西更成為焦點，呢位「美國隊長」早前於美聯盃因不滿球證畀紅牌趕隊友出場，嬲到搶咗球證本記事簿兼撕爛埋，被重罰聯賽停賽3場及未來兩年於美聯盃坐波監。

由於依家風頭火勢，「奇哥」雖照選丹普西入伍，但就將隊長臂章交畀隊友米高巴特利，美其名係想丹普西放低重擔專心比賽，不過此舉勢必激起「丹爺」心裏面嗰團火，必搏甩髀證明自己係當之無愧嘅「美國隊長」。

洪都拉斯走晒樣
洪都拉斯近年表現每況愈下，上年有參加世盃嘅謝利賓特臣、羅渣艾斯賓路沙、貝拿迪斯、伊薩古利都未有入選，只有侯城後衞美羅費古羅亞較為出名，喺蜀中無大將之下，効力中超FC青島嘅前鋒佐治卡洛斯亦要廖化作先鋒，人才凋零情況嚴重。

洪都拉斯近3仗熱身賽打和墨西哥及巴拉圭、僅輸巴西1粒，睇落幾對辦，但「拍跳」成績不能作準，況且之前10次同美國交手，洪軍就輸咗7次，面對有火嘅丹普西領軍兼有地利嘅「花旗國」肯定冇運行，美國要贏兩粒或以上冇難度，讓球主勝咪錯過。