今晚英超早場有曼聯作客新特蘭，近期「紅魔鬼」換帥嘅傳聞又再炒熱，「方丈」尹戈爾今季結束後就會被莫連奴取代，不過又有傳聞指曼聯只要以前4名完成今季，「方丈」就可保住帥位。點都好，無論尹帥季尾係咪會被炒，球隊上下依家嘅目標都係力爭來季歐聯席位，今場面對弱旅「黑貓」，真係非勝不可。「新年」新開始，曼聯隊長朗尼今場會着上全新波砵落場，呢位前鋒踏入2016年全面復甦，近8場入咗7球，加上佢對新特蘭經常入波，紅魔今場靠得住，客勝值捧。

（now 621周六晚8時45分直播）

英媒日前齊爆莫連奴已同曼聯達成協議下季領軍，不過英國《鏡報》就指尹戈爾對於保住帥位充滿信心，只要佢可以帶領紅魔衝入前4，下季會繼續由佢執教。但排緊第5位嘅曼聯要爭前4攞歐聯席位真係有難度，上場作客車路士臨完場被逼和1比1，痛失2分，搞到依家落後第4嘅曼城6分，今場鬥新特蘭再唔贏爭前4好渺茫。

曼聯隊長朗尼賽前喺社交網站宣布今場會着上全新波砵，對鞋用薄荷綠色好搶眼下，唔知朗尼今場嘅表現會唔會都咁搶鏡呢？事實上，上半季被狂插零表現嘅朗尼，嚟到2016年已經鹹魚翻生，1月至今踢咗8場波，一共入咗7球，佢同安東尼馬迪爾及連格兩位翼鋒互相走位配合，令敵方守將防不勝防。朗尼過去8次聯賽鬥新特蘭入咗5球，包括今季首循環主場大勝「黑貓」3比0一戰，朗尼成功入波終止個人喺英超連續999分鐘嘅入球荒，睇嚟「黑貓」係朗尼嘅福星喎！

新特蘭傷兵多難搶分
排緊第19位嘅「黑貓」，護級形勢水深火熱，但球隊有多位傷兵，包括翼鋒鄧肯禾特摩亞、謝明蘭斯、施巴斯坦拿臣、後衞卡保奧等人，實力大減，上場對利物浦雖然喺落後兩球嘅劣勢下成功逼和2比2，但主因係利物浦防守唔掂，門將米洛列特再次「派膠」，但今場對手曼聯擁有「神龍」迪基亞，加上「紅魔鬼」在尹戈爾帶領下踢法以穩陣行先，新特蘭今場難再複製上場奇迹，一於熱捧客勝！