澳職今日上演「墨爾本打吡戰」，由墨爾本城喺主場迎戰墨爾本勝利。兩隊近年交手都多波入，加上墨爾本城近期喺主場經常上演入球騷，近8仗有6場都開出總入球4球或以上，呢場係打吡戰肯定踢得肉緊，入球大細中位數轉到3.5球都冇有怕，阿King照捧大盤。

（有線64及203台周六下午4時30分直播）

「墨爾本打吡戰」向來備受注目，因為近年對賽都出現唔少入球，令球迷睇到如癡如醉。講返今日場波，墨爾本城今季表現係近年最好，長期排喺積分榜前列，而且44個聯賽入球更係冠絕澳職，球隊踢法明顯進取。不過，墨爾本城嘅防守就唔係好叻，聯賽踢到而家已經失咗33球，只係好過包尾嘅中岸水手，入得又失得嘅情況非常普遍，而且佢哋近8次主場有6仗嘅總入球都係4球或以上，今仗打吡戰大有機會又出現呢個情況。

墨爾本勝利今季作客表現明顯唔掂，近7仗客戰輸咗5場，唯一可喜嘅係佢哋攻擊力唔錯，已經連續8場都入到波，當中不乏大比數戰果。勝利今仗有前鋒艾奇湯臣同賓卡法拿復出，配合聯賽已經入咗14球嘅射手貝利沙，相信有力攻破墨爾本城嘅大門，就算入球大細中位數轉咗3.5球，都一於照捧大盤。

梅斯主場有餐開
另一場較早時間開波嘅澳職賽事，FC悉尼主場對珀斯光輝。FC悉尼主場入球能力甚高，而光輝3連勝狀態唔錯，兩軍同樣入得又失得，捧大盤冇衰。

（有線64及203台周六下午2時15分直播）

至於法乙獨腳戲由梅斯主場對勒哈弗爾，梅斯換帥後獲4勝1和1負表現回穩，今仗可贏近6仗作客不勝嘅勒哈弗爾。

（周六晚9時開賽）