新正頭先同讀者拜年，祝大家心想事成，猴年贏到開巷。今日重心推介場次係英超史雲斯主場對修咸頓，「天鵝」自易帥後未輸過，仲處於蜜月期，修咸頓作客竟然要讓波，但睇番水位逾2倍明顯熱唔透，史雲斯受讓筍到暈，下盤咪走寶。

（now 623周六晚11時直播）

大戶近期勢如破竹，上輪英超大戰車路士主場對曼聯，喺紅魔先開紀錄後，當時車仔要讓平半，佢哋有理冇理照插落車仔上盤，最終補時階段扳平中到應一應，睇嚟大戶嘅手風順番好多，嚟緊之後要跟住買。

新帥蜜月期重返正軌
講番史雲斯對修咸頓，史雲斯班波絕對唔差，喺評級指數上一直處於中上游位置，今季要淪落到打護級，全因內部「人禍」所致。好彩新帥古度連自1月中接手後，「天鵝」4戰2勝2和未輸過，逐漸上返正軌，若單計盤路亦取得2贏1走1輸，絕對唔失禮，當中射手基菲爾施古臣及阿休近期輪住入波，前者更係近5仗入4粒，可謂射到着晒火。

修咸頓狀態亦處於高點，近5仗4勝1和，但咁樣反而令佢哋今場作客都要讓波，變得唔多划算，從初盤所見，修咸頓讓平半之餘，仲有2.02倍高水，莊家點會咁益大家吖，擺明係熱唔透，亦反映出佢哋對「聖人」唔多夠信心，肥叔認為兩軍都弗嘅情況下，梗係捧受讓嗰隊喇，一於撐有埋地利嘅「天鵝」下盤。