拿玻里客戰祖記大打出手
今晚意甲爆發榜首大戰，祖雲達斯主場鬥拿玻里，排第2位嘅祖雲達斯現時僅落後對手2分，換言之今仗只要贏波，就可以搶走拿玻里嘅一哥位置，肯定使出渾身解數爭勝。南部代表拿玻里有望相隔26年再嘗意甲冠軍滋味，喺超級射手希古恩助陣下，無懼同主隊駁火，首選入球大。
（TVB 301周日凌晨3時45分直播）
季初演出失準嘅祖雲達斯，由上年11月開始踩行油衝刺，結果造出聯賽14連勝超勁走勢，表現勢如破竹，「嘭嘭聲」追到上依家第2位，證明呢支班霸根基深厚，有能力連續5季奪取意甲冠軍。目前亦係祖記爭標最重要時刻，只要維持強勢，可以一鼓作氣衝冠，相反如果失利被打窒道氣，隨時功虧一簣。祖雲達斯冇選擇餘地，今仗必傾全力搶攻。
兩大阿根廷神鋒鬥射術
祖雲達斯嘅阿根廷前鋒保羅戴巴拿大勇，近5仗聯賽射入4球，今季已有13球進帳，球隊要入波唔成問題。不過祖記兩位後衞基亞連尼、馬田卡沙利斯及防守中場基迪拉受傷缺陣，防線有隱憂，未必保得住清白之身。
另一邊廂，拿玻里亦取得聯賽8連勝，希古恩連續6場意甲有波入，呢位阿根廷國腳今季已轟入24球，包括首循環射破祖雲達斯大門贏2比1。由於意甲一向由北方球隊祖記、米蘭雙雄壟斷，拿玻里屬於南部球隊爭冠唯一希望，特別有使命感，作客都唔會退縮，開大機會高。
