今晚英超尾場車路士主場迎戰紐卡素，有傳車仔全力搶買拿玻里弗爆前鋒希古恩，箭頭迪亞高哥斯達為保地位必打爭氣波，撞正作客表現曳到冇朋友嘅「喜鵲」，正係「迪哥」騷哥利嘅好時機，直取讓球主勝。

（now 621周日凌晨1時30分直播）

紐卡素作客5連敗
英國傳媒大爆，原來車仔喺冬季轉會窗曾出價4,000萬鎊力斟拿玻里嘅阿根廷前鋒希古恩過檔，呢位依家入咗24球嘅意甲射手榜一哥，因為未能確定有得擔正而拒絕上「車」，證明主帥希丁克仍對陣中箭頭迪亞高哥斯達非常信任。但眾所周知希帥教到季尾便走人，唔保得「迪哥」幾耐，預計今夏車仔會繼續斟希古恩，因此「迪哥」要生生性性踢好波，上仗佢臨尾入波逼和曼聯，近4仗聯賽入3粒明顯弗番。

另一邊廂，紐卡素雖喺冬窗買入舒維爾、沙維特、安祖斯唐辛及杜姆比亞等中前場猛將，但太多新人入隊磨合需時，而主帥麥卡倫對不穩防線卻冇乜增兵，至今失咗44球，係英超失球第3多嘅球隊，難怪依家排緊尾4喇。最弊係紐卡素客場出擊堅曳，連盃賽在內已錄得5連敗，仲要入得1球咁大把，全冇還手之力。況且近3次造訪史丹福橋球場，紐卡素全部輸晒，場均輸兩球或以上，今仗面對急於發圍嘅「迪哥」，實在凶多吉少，讓球主勝非常值博。