為下周歐聯壯行色
歐聯16強首回合下周中拉開戰幔，葡超一哥賓菲加、意甲球隊羅馬提早今晚踢聯賽，皆因要騰出更多時間備戰歐聯。賓菲加今仗葡超主場惡鬥波圖，至於羅馬作客卡比。兩隊目前走勢凌厲，當然要食住個勢，力爭再下一城，為出戰歐聯壯行色。

賓菲加國家打吡要贏波
歐聯16強首回合下周中拉開戰幔，葡超一哥賓菲加、意甲球隊羅馬提早今晚踢聯賽。先講賓菲加會喺主場同死敵波圖進行「國家打吡」。連奪近兩季聯賽冠軍嘅賓菲加，於各項賽事取得11連勝，成功收復失地，上仗贏波後升上榜首，狀態及士氣都處於巔峰，勒都勒唔住，而且下周中歐聯主場對手辛尼特唔算強，相信賓菲加今仗會全力擊敗死敵波圖，博主W。

（now 676周六凌晨4時30分直播）

賓菲加今季改由域陀利亞執教，季初頻頻失分，但呢支班霸始終有質素，適應新帥戰術後，急起直追，近14場聯賽取得13勝1和，上仗大炒比蘭倫斯5蛋，憑較佳得失球差，反超前同分嘅士砵亭，重奪榜首，意義重大。賓菲加難得做番一哥，絕對唔想再落後，而功虧一簣，即使有歐聯後顧，亦冇得保留。射手莊拿斯干卡維斯大勇，今季已轟入23球，拍檔美度古上仗更大演帽子戲法。以呢條鋒線級數，要撕開波圖防線並唔難。

波圖易帥未有起色
波圖上月中炒咗洛佩特吉，由比斯路接手執教，但表現並冇大改善，葡聯盃出局之餘，上仗聯賽主場竟然輸畀阿洛卡。今仗面對如日中天嘅賓菲加，波圖更加冇得逞強。事實上，波圖近3次作客賓菲加，僅1和2負，只入1球，睇怕今場冇運行。

羅馬醒神打卡撳住搶
羅馬上月請史巴列堤回巢執教後，已漸入佳境，意甲連贏3場，新兵艾沙拉維上仗雖然冇波入，但仍貢獻1次助攻，表現Sharp醒，今仗作客對尾三嘅卡比，相信羅馬有力延續反彈之勢，全取3分而回，簡單要客W。

（TVB 301周六凌晨3時45分直播）

史巴列堤唔止教波掂，簽人亦獨具慧眼，早前向ＡＣ米蘭借用艾沙拉維，呢位「小法老」首兩仗披甲都入波，上仗妙傳另1位新兵柏洛迪建功，以2比1擊敗森多利亞，可見羅馬冬季增兵非常奏效。「雌狼」現時落後第3位費倫天拿2分，為爭取下屆歐聯入場券，不容再失。同埋羅馬將於下周中歐聯主場鬥皇馬，更加需要保持高昂士氣，正好搵卡比祭旗壯聲威。

首循環5:1大炒卡比
新升班嘅卡比「遇強即屈」，聯賽首循環以1比5慘敗於羅馬腳下，近兩仗鬥費倫天拿、拿玻里，都輸波收場。加上中場拉菲爾比安高停賽，更加無力破壞羅馬大事。