近況回勇搶分護級
雖然包尾大幡一向唔值得支持，但凡事總有例外嘅，就好似今晚出戰嘅意甲榜尾維羅納。呢班波由1月中開始逐漸回勇，連續5仗未輸過，為咗搶分護級，今仗作客啞晒火嘅拉素，有力延續不敗走勢，2.65倍「讓客」梗係要追。

（TVB301周五凌晨3:45直播）

維羅納今季作客仲未贏過，成績咁曳真係好難令人對佢哋有信心。但如果細心留意番佢哋最近走勢，就會發現呢班波嘅表現並唔失禮。呢支意甲球隊最近錄得5場不敗，仲要係對羅馬、拖連奴等中上游球隊身上頻頻搶分成功，可見班戰將士氣、信心都返晒啦。

維羅納近5仗不敗
最振奮軍心嘅係，維羅納終於喺今年2月初取得今季聯賽首場勝仗，主場揮低阿特蘭大2:1。之後佢哋好似打咗支強心針咁款，上仗再度發威，主場同國際米蘭激戰至3:3，前意大利國腳射手柏仙尼亦喺呢5場比賽入面射入3粒，睇得出佢哋全面上力。個勢咁勇，加上佢哋仲要搶分護級，現階級的確不宜同維羅納作對囉。

拉素攻守都唔掂
另邊廂嘅拉素表現反覆，近6場比賽只係贏得1鋪，想贏波真係危危哋。再講吖，佢哋連續3場食白果之餘，鋒將馬特尼、菲臘安達臣陷入球荒，下下單靠翼鋒簡達華1個衝鋒陷陣，火力冇保證點靠得住先？更何況呢班波傷兵滿營，至少9件球員唔踢得，加埋守將馬高柏洛路坐波監，攻守都唔掂，今仗讓唔起維羅納咯。