英足盃第4圈重賽，西布朗作客英甲球隊彼德堡，兩軍上次交手踢成2比2，彼德堡喺兩度落後嘅劣勢下都可以逼和對手，今場返到主場，雖然班次有別，但唔係一定冇得打。彼德堡近4主場加埋只係失咗1球咁大把，而今仗係西布朗3連客嘅第2站，周末球隊仲要喺英超作客愛華頓，領隊佩尼斯今場或會留力，細盤值捧。

（周四凌晨3時45分開賽）

喺英超排第14位嘅西布朗25戰得29分，距離護級安全線只多6分，護級當然係重中之重，球隊近期賽程都幾密，上月尾同彼德堡踢完英足盃後，抖咗3日就踢英超快車，主場對史雲斯靠荷西朗頓臨完場入波辛苦逼和1比1，跟住上周六展開3連客之旅，先不敵紐卡素0比1，跟住今場作客彼德堡，尾站係客戰愛華頓。

以西布朗嘅兵源，根本不足以應付咁密嘅賽程，加上中場占士摩利臣、卡林麥馬拿文都要養傷，預計主帥佩尼斯會派出部分副選出擊，包括麻煩友比拉希奴，雖然佢喺上場鬥彼德堡一戰梅開二度，但今場想重施故技就唔係咁易，始終彼德堡主場都算幾硬淨，近4主場只失1球，而且近6仗主場皆開細，今場捧細啱數。

樸迪莫倫斯受讓有計
至於葡聯盃第3圈，馬里迪莫主場對甲組仔樸迪莫倫斯，馬里迪莫近3主場錄得1和2負，樸迪莫倫斯曾於分組賽擊敗勁旅士砵亭，今場或有望再製造驚喜，受讓值捧。最後講埋蘇超羅斯郡喺主場迎戰赫斯，羅斯郡近4場全開大，4場皆轟入2球或以上，赫斯火力亦唔嘢小，捧入球大！