中堅買少見少 防線點靠得住
今晚繼續有德國盃8強上演，德甲班霸拜仁慕尼黑會造訪波琴。拜仁雖有翼鋒列貝利康復，但球隊正面臨中堅荒，焗用小將甘美治鎮守防線，真係好易出事。何況波琴弗到漏，今次鬥拜仁唔會坐以待斃，就算中位數為3.5球，2.05倍「大」亦值得支持。
（TVB13周四凌晨3:30直播）
羅拔仔去盡博加薪
拜仁級數高波琴幾多，相信大家都知，捧佢哋贏波真係冇肉食，何況上年12月拉傷肌肉休養至今嘅翼鋒列貝利傷愈，今晚有機會落場，更令球隊鋒力大增。咪忘記前鋒羅拔利雲度夫斯基腳風頗順，歇冬後3戰攻入4球，加上西班牙《阿斯報》爆料話，「羅拔仔」恃住自己受皇馬、曼城垂青，向拜仁提出以1,800萬歐元年薪續約，今晚梗要騷哥利增加籌碼啦。
之不過想拜仁向對手派蛋就難度唔細，事關佢哋中路勁缺人，中堅貝拿迪亞、查維馬天尼斯、謝路美保定先後打柴。雖然拜仁由莫斯科斯巴達借入泰斯治，點知佢喺首課操練就撞傷，預料教頭哥迪奧拿焗用小將甘美治，夥拍畢斯杜巴鎮守後防，始終令人難以安心。
波琴近況弗到漏油
至於對手波琴喺冬季轉會窗未有動靜，不過唔好咁就睇低佢哋，計埋熱身賽在內，呢班波近8戰取得6勝2和不敗佳績，當中更試過喺歇冬假期間約戰利華古遜、慕遜加柏同哈化柏林，最終3場波贏晒不特止，更合共攻入對手11球，對佢哋信心梗係好大鼓舞。翻查紀錄，波琴最近4次硬撼拜仁，即使輸晒都好，但至少都會有斬獲唔會失禮，既然波琴近排咁勇，呢鋪邊甘心喺自己地頭龜縮先？一於整場入球騷出嚟氹吓球迷開心。
