德國盃8強，拜仁慕尼黑作客德乙波琴，拜仁教練哥迪奧拿確定季後離任，希望好頭好尾，以「三冠王」身份告別。呢支德甲班霸上屆德盃4強止步，成為哥帥心中一條刺，今屆捲土重來，爭標欲望更旺盛，鬥乙組仔亦唔會留情，屬於大炒格，大細中位數3.5球，照捧大盤。

（TVB13周四凌晨3時30分直播）

聯賽放甩 哥帥唔使留力
拜仁慕尼黑喺聯賽領先次席多蒙特8分，下仗德甲對手只係奧格斯堡，哥迪奧拿唔需要留力，可以放心派強陣出擊。拜仁亦收到好消息，翼鋒列貝利已可以跟隨球隊完成整課操練，意味傷勢已完全痊愈，有復望出，令哥帥有更多進攻組合選擇，要入波唔成問題。不過，拜仁防線傷兵頗多，謝路美保定、貝拿迪亞、查維馬天尼斯繼續抖。因此、新加盟嘅中堅泰斯治今場有望擔正，但同隊友默契未必夠，如果拜仁失波亦唔需要感到意外。

波琴歇冬期間多次同德甲球隊踢熱身賽，明顯有備而來，而且表現唔錯，包括擊敗哈化柏林、慕遜加柏、利華古遜，應該可以增加球員信心，相信唔會消極死守。事實上，面對超班嘅拜仁，就算波琴輸波亦屬正常，球員冇心理包袱，應會踢得較放，有利製造入波。