「地上最強」巴塞隆拿今晚深夜會喺西班牙盃4強次回合作客華倫西亞，由於首回合大勝7比0，巴塞已穩入決賽，今場睇落主客雙方都唔似好有鬥志。尤其係巴塞作客一向勒住踢見好就收，今仗唔慌多波入，再睇埋佢哋對上7場作客有5場都開入球細，今場一於再追細盤啦！

（周四凌晨4時開賽）

加利佬志在聯賽開齋
巴塞首回合主場大勝7比0，主帥安歷基眼見晉級在望，周一搵咗5個青年軍球員加入一隊操練，擺明係想變陣踢次回合，畀一班主力抖抖。巴塞首席球星美斯啱啱做完腎石手術，就算好番今仗都未必會披甲，睇落唔似會大開殺戒。前巴塞球星軒歷拿臣日前返到母會探班，同恩尼斯達等舊隊友攬頭攬頸，仲話睇見巴塞踢波就好似打緊遊戲機FIFA咁，大戰前夕氣氛咁輕鬆，相信今場都唔會踢得太認真。

華倫西亞主帥加利尼維利近期飽受壓力，即使今場贏波出局，都未必能挽回球迷同董事局支持，反而留力應付周末聯賽主場對愛斯賓奴似乎仲實際。事關華倫西亞在「加利佬」手下聯賽9戰未贏過，喺聯賽開齋先係華倫西亞當前重任，今場西盃好大機會Hea踢等完場算數，一於捧細盤。