法足盃16強大戰，衞冕嘅巴黎聖日耳門（PSG）主場硬撼里昂。PSG早已喺法甲橫行無忌，但依家有唔少傷兵，甚至傳出暫時hold住拿維斯轉投FC上海（上海申花）一事添，加上下周中歐聯16強又重開，預計今仗對里昂會就住嚟踢頂盡小勝，讓球主客和PSG要讓一球，不妨吼讓球和。
（TVB 302周四凌晨4時05分直播）
傷兵滿營隨時就住小勝
PSG係上季榮膺國內三冠王（聯賽、法聯盃及法足盃），王者地位穩如泰山，今季於聯賽放到甩轆，早已視傳統對手如馬賽、摩納哥及今仗客軍里昂如無物。PSG當然想喺法足盃冧莊，但馬度迪及柏斯托尼等主力飽受傷患困擾，由於歐洲嘅冬季轉會窗已關閉，為穩陣起見，轉投FC上海已成定局嘅前鋒拿維斯，有傳要暫時hold住，待下周中歐聯16強重開對車路士嘅首回合後才放人，費事再有傷兵。
里昂早輪陷於低潮，包括1月中喺法聯盃遭PSG淘汰，好彩近兩場聯賽全勝總算止住血，前鋒拿卡錫迪重拾射門鞋，預計今仗唔會hea踢。不過以波論波，PSG點秤都係贏晒，就算為免再添傷兵就住踢，以伊巴謙莫域、迪馬利亞等嘅級數可恃質小勝，但主W得1.29倍太乏味，不如博PSG僅勝1粒、有3.65倍嘅讓球和。
