施丹前日同「銀河艦隊」續約至2018年，意味已坐穩帥位，全權主政，眾星都要乖乖聽話搏殺。事實上，皇馬喺呢位法國球王領軍下大踢悅目足球，今仗作客尾二嘅CF格蘭納達，相信亦唔會留手，皇馬讓兩球，都要讓球客勝。
（now632周一凌晨3時30分直播）
施丹上月初以皇馬B隊教練身份接手「銀河艦隊」帥印，表現令人驚喜，4戰取得3勝1和，攻入17球，正係皇馬球迷期待已久嘅性感足球。證明施丹球員時代嘅華麗足球非常適合皇馬，佢依家坐穩帥位，更加可以盡情表演。前鋒賓施馬喺施丹執教下4場比賽都有波入，呢兩個法國人果然合拍，加上C朗仍然大勇，連占士洛迪古斯亦翻生，CF格蘭納達大門肯定有難。
CF格蘭納達連盃賽在內，近9場輸7場，包括吞巴塞4蛋，甚至對伊巴都輸1比5！佢哋上季更曾被皇馬血洗1比9，今鋪都係凶多吉少。
