勝利猛將缺陣頂唔住
澳職今有場前列大戰，由排第5嘅墨爾本勝利主場對「一哥」西悉尼流浪者。勝利主場戰績彪炳，但今場有兩位主力停賽，陣容不整遇上兩連勝嘅流浪者，要贏波應該唔係易事。阿King睇返雙方近期嘅賽事，發現兩隊都入得又失得，今仗決定撐大盤。

（周六下午4時30分開賽）

勝利上仗雖然輸畀珀斯光輝，但嗰場係作客賽事，今仗回師近10場攞到9勝1和嘅主場，理應係起筷嘅時候。不過，勝利今場有前鋒賓卡法拿同中場馬夏斯累積滿黃牌停賽，另一中場卡爾華拿里病咗唔踢得，實力有所削弱下，難言穩勝。

西悉尼流浪者現時排喺榜首，以2分領先次席嘅布里斯班獅吼，今仗自然希望贏波鞏固「一哥」位置，球隊今仗只有基蘭巴古斯未能上陣，可以話係以最強陣容出戰。西悉尼流浪者近兩場聯賽皆贏波，而且最近4場波都開出大盤，可見球隊近期處於入得又失得嘅狀態，今仗遇上主場王勝利入波應該唔會少，阿King推介有1.62倍嘅大盤。

蘇超聖莊士東吼細盤
至於另一場澳職，獅吼有前鋒桑蘇拿辛奴同守將普蘭斯唔踢得；而水手前鋒奧當路雲則要坐波監，但球隊獲路爾斯加西亞加盟後上仗即贏波，今仗就算作客都會同與獅吼搶攻，入球大細中位數轉3/3.5球都要捧大盤。

最後到蘇超獨腳戲，由聖莊士東主場對鴨巴甸，聖莊士東上周喺盃賽慘遭蘇冠球隊喜伯年淘汰，連續七仗贏唔到士氣低落，但鴨巴甸周中多踢一場賽事，預計都唔會咁搶韁，今仗捧細盤。