近期勢如破竹嘅阿德萊德聯，今日澳職主場迎戰FC悉尼，聯賽5連勝絕對唔成問題！阿德萊德聯依家勇絕澳職，阿根廷王牌球星卡路斯卡狀態巔峰，被視為今季聯賽最佳球員熱門之一。相反FC悉尼連輸2仗後士氣低落，賽前仲有主力離隊，「阿聯」3.85倍「讓球主勝」抵博。

（有線64及203周五下午4:40直播）

卡路斯卡狀態fit
阿聯教練阿摩上任後頭8場聯賽不勝，好在撻着後聯賽4連勝之餘，近9場聯賽錄得7勝2和。阿根廷核心卡路斯卡連續2場入波，加上箭頭沙治奧施里奧傷愈，日前更得到荷蘭前鋒沙治奧雲迪克回巢，配合迪捷特、柏保路山齊士攻堅，火力夠晒保證。

悉尼「最佳新星」離隊
FC悉尼近兩仗連續不敵爭標分子墨爾本勝利及布里斯班獅吼後，士氣低落，就連「最佳新星」謝斯巴治轉投挪威洛辛堡，呢班波冇咗呢位攻守兼備嘅左閘，戰鬥力大減，睇怕今仗都好難搶到分咯。