西維爾搶盃心切Ｗ得
 
今晚上演另一場西班牙盃4強首回合，西維爾主場迎戰切爾達，西維爾堪稱「盃賽專家」，近10年曾兩次捧西盃、4次贏歐霸盃，今仗又係佢哋表演時間。至於切爾達下半季勁跌Watt，加上射手洛尼圖有傷在身，更加唔係西維爾對手，簡單要主W。

（周五凌晨3時30分開賽）

西維爾最近1次奪西盃係2010年，今屆抽到好籤，8強對手只係乙組仔米蘭迪斯，結果輕鬆晉級，證明球隊的確好有「盃賽運」。除咗運氣之外，西維爾狀態亦相當勇猛，近8場比賽取得7勝1和，該場和波係同馬體會互交白卷，絕對唔失禮。由於聯賽畀巴塞、皇馬、馬體會壟斷，西維爾干脆集中力量爭盃賽，值得睇好。

切爾達走晒樣近況頹爆
切爾達季初曾經製造唔少驚喜，包括大勝巴塞4比1，不過球隊始終屬於小型班，人腳韌力不足，下半季表現走樣，實在非常頹。球隊靈魂人物洛尼圖雖然留隊，但卻受傷患困擾，令球隊雪上加霜，作客更加惡唔出樣。