老細（目及）到實
做打工仔嘅，老細成日落場巡視業務，仲有邊個敢作反hea住做。希丁克深明此道，呢位車路士看守領隊上任後，不時主動邀請油王阿布拉莫域嚟訓練場視察。咁高招，難怪車仔班大牌球星都唔敢再玩嘢，一眾「士哥拿」亦搶住發力頻頻開炮，球隊戰績自然穩步上揚。今晚藍戰士作客攻力下滑嘅屈福特，讓到半一都冇有怕，照捧2.22倍上盤。

（now621台周四凌晨3:45直播）

唔少領隊都驚班主過分干涉球隊事務，不過經驗豐富嘅希丁克偏偏出奇制勝，搬出油王鎮住班球員。佢表明好歡迎阿布探班，連青年軍賽事都會嗌對方入場：「我好歡迎高層嚟訓練場，阿布對上幾個星期都嚟過幾次，我仲同佢哋講唔使驚畀到壓力我同球員添。」油王經常親臨科伯姆訓練中心考察，班球員仲邊會唔認真訓練先？

米基爾大讚好過莫連奴
咁希丁克又唔係一味靠嚇，佢亦好識得同球員溝通了解大家諗法，呢點就叻過「寸王」莫連奴多多聲。中場約翰米基爾就大讚希帥：「佢經常同球員溝通，呢點係我哋喺上任領隊身上唔多感受到囉。」軟硬兼施，點會馴服唔到班球員吖！

事實上，車路士自希丁克上任後9戰不敗，4場作客取得3勝1和。更放心嘅係球隊重拾火力，迪亞高哥斯達近6戰入4粒，中場奧斯卡杜斯山度士上仗「戴帽」，低迷多時嘅王牌夏薩特，上場亦打破入球荒，以藍戰士近6仗轟入16球嘅火力，足夠摧毀屈福特防線咯。

何況屈福特兩大箭頭恩哈路同迪尼近況轉沉，連累球隊近5鋪聯賽得1勝4負。後者對上一次唔靠12碼士哥，要追溯到上年11月尾，結果連帶恩哈路亦跌watt，5場聯賽入得2粒。領隊科里斯都知驚，可惜心儀目標艾迪巴約最終轉投水晶宮，令球隊錯過加強鋒力機會。新兵翼鋒岩拉伯特、中場馬里奧蘇亞雷斯又未踢過英超，好難要求佢哋即時交貨。再睇埋班波已經連續6場英超失守，呢鋪好難頂得住全面回勇嘅藍戰士啫，捧上盤最明智！