今晚意甲、法甲好戲連場，意甲國際米蘭主場對基爾禾值得留意；國米歇冬後表現急轉直下，上仗打吡戰吞ＡＣ米蘭3蛋之餘，教練文仙尼更因鬧球證而被趕出場，今仗需要停賽。國米群龍無首更難挽頹勢，估計最多只能小勝基爾禾，主Ｗ高風險低回報，寧願揀入球細。

（TVB 301周四凌晨3時45分直播）

國際米蘭聖誕前仲排榜首，但經過近4場聯賽2和2負後狂跌10分後，依家已落後「一哥」拿玻里9分，爭標機會愈來愈細。主帥文仙尼似乎已黔驢技窮，上仗對ＡＣ米蘭，自己都情緒失控被球證驅逐，仲被影到向敵對球迷豎中指，認真無品。身為教練其身不正，又點叫球員搏命；好彩今場對手基爾禾實力較弱，國米應該有力贏波，但唔好期望會大勝。事實上，國米今季11場聯賽主場有8場開細，比率達73％，值得再追。至於基爾禾日前將首席射手柏路斯治出售畀史雲斯，更加無力反擊，今仗惟有「泊大巴」死守。

法甲方面，榜首巴黎聖日耳門已經遙遙領先，對手只有自己，佢哋今仗主場對羅連安特，力爭打破法甲最長不敗紀錄，當然唔赦對手，直取讓球主勝。

（TVB 302、now 714周四凌晨4時直播）

波圖跌Watt捧對家
另外，葡萄牙盃4強首回合，基維辛迪主場對波圖，波圖近4次作客3敗，包括葡聯盃輸畀甲組仔法馬利卡奧，今仗對甲組隊基維辛迪未必佔到甜頭，博受讓嘅基維辛迪讓球主勝。