喺1月轉會窗大出風頭嘅紐卡素今晚將作客愛華頓，紐卡素依家喺聯賽榜排緊第18位，為護級急需搶分，今場焗住要攻，新兵安祖斯唐辛有望首演，聯同舒維爾、艾約斯佩雷斯等人，有望攻陷愛華頓脆弱防守。「拖肥糖」近4次主場鬥紐卡素全開大，一於再追！

（now 622周四凌晨3時45分直播）

紐卡素喺冬季轉會窗買入中場舒維爾、安祖斯唐辛同沙維特，仲從羅馬借得前鋒杜姆比亞，但杜姆比亞或因工作證問題今場缺陣。不過「喜鵲」多咗舒維爾同安祖斯唐辛，攻力有望進一步加強，其中「光頭仔」舒維爾喺處子戰鬥韋斯咸已經大顯身價，交出2個助攻協助「喜鵲」贏波，其出色表現更獲選為該仗最佳球員。紐卡素近3仗皆開大，攻力唔錯，令人擔心嘅係防守較曳，之前賽和曼聯3比3、作客不敵屈福特1比2，都曝露出喜鵲防守力疲弱嘅問題。

愛華頓作客照攻可也
愛華頓同樣係有攻冇守，今季試過多次同對手出現大手交易，包括和車路士3比3、不敵史篤城3比4、輸畀李斯特城2比3、大勝新特蘭6比2等，加上球隊過去4次喺主場鬥紐卡素全開入球大，大盤真係捧得過。「拖肥糖」亦喺轉會窗最後一日買入莫斯科火車頭前鋒奧馬尼亞斯，不過佢同樣係因為工作證問題未能趕及上陣，但盧卡古、巴克里、迪路菲奧等進攻主力今場皆可出戰，同紐卡素鬥攻，爭取入波冇難度呀！