追趕不敗紀錄氣勢如虹
巴塞隆拿今晚喺西班牙盃4強首回合主場對華倫西亞，即使「-2」都要揀「讓球主勝」。計埋盃賽，目前巴塞已連續26場不敗，距離隊史最長不敗紀錄只差兩場，主場出戰肯定唔想衰，對家華倫嘅教練加利尼維利，難聽講句根本唔識教波，造訪魯營同送死冇咩分別！

（開賽時間：周四凌晨4:00）

雖然巴塞日前喺西甲主場以2:1反勝馬德里體育會，打多兩個都唔能夠大勝，但反而令人覺得，佢哋某程度係留力砌華倫，畢竟上場佢哋控制大局，唔需要太搏命，如果唔係畀馬體會球員踢傷就唔好啦，最後佢哋Hea住贏，美斯、尼馬同蘇亞雷斯冇傷冇病可以繼續搏殺，粉絲可以放心晒！

仲有喎，巴塞近26場有21勝5和，距離2010/11年球季創造嘅連續28場不敗球會紀錄，只差兩場，相信教練安歷基唔會希望喺呢個時候出事。最難得係，近況大勇嘅蘇亞雷斯同傳媒講，根本唔恨拎歐洲金靴獎，只要巴塞贏波就冇問題，強大嘅士氣同凝聚力有助巴塞繼續贏波。

加利佬水皮教唔掂華倫
另一方面，華倫喺加利尼維利接手執教後，簡直已淪為西甲三流球隊，佢上任後，基本上淨係識恰CF格蘭納達同拉斯彭馬斯呢啲魚腩，日前華倫主場對希杭，竟然夠膽死以0:1輸埋，睇得出加利佬根本搞唔掂隊波，加上射手柏高艾卡沙養傷，撞到巴塞好似學生冇溫書去考試一樣，衰硬啦！