女子世盃決賽聽朝喺溫哥華上演，美國女足同日本女足合演上屆決賽翻版戰，讓半一唔抵捧。雖然美國女足門將蘇露連續5場不失上晒身，但兩隊近6次對賽佢未試過保持清白，唔排除日本女足再做剋星，攻破佢十指關開下盤！（中央5台周一早上7:00直播）

上屆決賽兩隊激戰120分鐘踢成2:2，最後美國女足喺互射12碼以1:3不敵日本女足飲恨，雖然佢哋喺倫奧女足決賽，贏番2:1拎金牌成功報仇，但「美女」門將蘇露對住「粉紅兵團」似乎冇乜辦法，計埋上屆決賽，已經連續6次對賽未試過保持清白完場，今場決賽失波一啲都唔出奇。

連續6次對賽失波
冇錯，美國女足喺4強以2:0解決德國女足，門將蘇露連續5場不失，但除咗佢要應付命中剋星，隊長雲芭芝仲已經35歲，狀態下滑連續兩場做後備。睇番美國女足連續5場開入球細，相信大家都會明白，現時佢哋嘅進攻火力不足，假如蘇露唔能夠保持清白，就好難喺90分鐘內解決對手。

美女死火5連細
對手日本女足喺4強以2:1淘汰英格蘭，只係完場前靠對方自殺式擺烏龍至能夠險勝，而且上屆最佳球員兼神射手澤穗希已經36歲，進入淘汰賽後已連續3場做後備，但日本女足打開整體戰，影響唔算致命，何況有扭得射得嘅岩淵真奈做後備殺手，受讓半一抵撐。