聖保羅人心惶惶
唔少巴甲球會都有財政問題，最快嘅籌錢方法就係賣人套現，好似聖保羅就趁住轉會窗重開極速賣走3件主力，佢哋嘅散貨行動仲陸續有嚟，搞到教練卡路士奧蘇里奧勁頭痛。家陣聖保羅內部立立亂，聽朝主場迎戰回勇嘅富明尼斯仲點贏波先？2.05倍「讓客」咪走寶。（開賽時間：周一凌晨3:00）

聖保羅近日已經賣走中場丹尼遜、祖斯夫蘇沙同中堅保羅米蘭達，不過球會意猶未盡，中場洛迪高卡爾奧因為合約問題傾唔掂，轉投華倫西亞一事告吹，球會就即刻轉向馬體會兜售，據講包括射手柏圖等人紛紛列入咗球會嘅銷售名單。就連教練奧蘇里奧都頂唔順：「我真係好冇安全感，完全唔知班球員聽日仲喺唔喺度，仲可以點樣備戰？」

富明尼斯力追榜首
相反富明尼斯就可靠得多，最近連贏3場後，已經追近榜首利斯菲體育會至2分差距，加上中堅安東尼奧卡路士已經傷愈復出，呢次作客對住內部人心惶惶、連輸2仗嘅聖保羅，莫講話搶番分，隨時贏埋都唔出奇！