今輪意甲上演米蘭打吡，AC米蘭主場迎戰國際米蘭，一度傳出將會被炒嘅AC米蘭教練米赫洛域絕處逢生，帶領球隊暫時走出低谷，但今場打吡戰，先至係決定米帥前途嘅關鍵，肯定盡地一煲。國米前晚簽入森多利亞射手艾達馬田斯救亡，唔會坐以待斃，首選入球大。

（TVB 301周一凌晨3時45分直播）

AC近期打入意大利盃4強，加上聯賽擊敗費倫天拿，令米赫洛域鬆一口氣。但佢未過「危險時期」，皆因會方極重視米蘭打吡，如果AC無法勝出，恐怕米赫洛域一樣「冇得留低」，AC射手卡路士巴卡近2場意甲都有士哥，今季已有10球進帳，中場奇雲保定回巢後即有建樹，巴迪洛利上仗意盃亦射入12碼，有本錢同國米駁火。

國米簽艾達馬田斯添攻力
國米歇冬後成績跌Watt，已經3場聯賽未贏過，上仗意盃仲吞祖雲達斯3蛋。會方前晚迅速簽入艾達馬田斯，佢應該可以趕及今仗上陣，改善疲弱鋒力。呢位29歲巴西裔射手近年喺意甲表現出色，入咗12球，手持意國護照嘅佢更獲意大利領隊干地選入國家隊，級數有保證，國米火力有望提升，2.05倍大盤捧得過。