今晚兩場英足盃都係英超兵作客低組別隊伍。當中近期作客表現好轉嘅車路士，將造訪英冠米爾頓凱恩斯。米軍近況雖然一般，但球隊主場表現向來唔錯，遇上有射手迪亞高哥斯達上陣成疑嘅車仔，半場應可頂住唔輸，阿謙推介2.55倍半場和。

（周一凌晨零時開賽）

米爾頓凱恩斯主場硬淨
車路士自希丁克上場後未嘗一敗，上周作客更以1比0小勝阿仙奴，表現漸入佳境，而作客成績亦大有改善，可預期「藍戰士」已全面復甦。不過，車路士近日遇上挖角潮，巴西中場拉美利斯被中超FC江蘇以2,800萬歐元天價挖走，好彩近日成功由聖保羅借到前巴西射手柏圖，對球隊實力冇大影響，不過柏圖今仗只能暫時做住觀眾，加上有傷嘅西班牙前鋒「迪哥」雖已復操但未必會上陣，今仗未必能咁輕易KO對手。

米爾頓凱恩斯現時排英冠第20位，處於護級邊緣，球隊剛喺聯賽以1比3不敵保頓。不過佢哋主場表現其實唔錯，近5仗錄得4勝1負，輸嘅一仗對手係前列分子般尼實非戰之罪。米軍今仗有前鋒美爾納特、中堅厄遜同中場卡爾巴卡有傷唔踢得，面對強隊相信會先求穩守，半場有望頂得住「藍戰士」進襲，半場和好路。

撐愛華頓炒起卡素爾
另一場英乙卡素爾主場鬥英超嘅愛華頓，雖然卡素爾連和4場表現平穩，但實力難與英超球隊相比。至於愛華頓近4仗雖未贏過但表現唔差，今場面對乙組仔自然希望大勝發洩，讓球客勝捧得過。

（周日晚9時30分開賽）